انته نور-مـــحمدابوعمارالحزباوی -مدونةغروب الشط

یامحب رادونی اوصفک

ظنو العذال بوصافک یخل بیه الشـّعور

مادرو حته القریحه المیته من ینجاب اسمک

تشرگ اللحد اوتثور

اومادروبیک الحیاة اتعود ترجع حته لصحاب القبور

اومادرو کل المشاعر بیک تسّودن تهیج اوتبحر ابکل البحور

وآنه من رادونی اوصفک جاشت ابروحی القریحه ابکل غرور

اوحضـّرت قلمی اوورگتی اوقلمی گام ایبوس بشفاف السّطور

واول اوصافک حبیبی انته نور

انته شمعه اوحبک اتجسده الفراشه

اوتشتعل لجل الحبیب اوبلعشگ دایم تنور

انته ریحان البساتین الجمیله

انته خل عطـّرخلیله امن احترگ مثل البخور

وانته عطر الشـّوگ کله السّاکن ابگلب الزّهور

انته مای العاشگ الگاع اوبذرها اوکل أرض دونک تبور

اولوشفت حاجز یمنعک عن حبیبک

تصعدابصورة بخار اوبسّما اغیوم اوتدور

اومن تشوف ابذورمیته،

تنهمل مثل الدّموع اوتنزل اتنعش البذور

انته قطرات النده المثل البلور

اولو شفت زعلت وردتک تنزل الها اتبوسهه ابوکت السّحور

انته ضفتین النهر حبک وصلها،

اوللحبایب تجعل اضلوعک جسور

انته حارس تنطر اعشوش النـّوارس،

انته محصول المدابس انته دبس البتـّــمور

انته بسمه ابشفـّة اطفال المدارس،

انته سالوفة مجالس تنحچی ابکل العصور

انته وگده ابموگد النـّشمی الکـــریم اودلـّـته ابحضنک تفـــور

انته قمة جبل عالی اوعله امتونک حامل اوکار الصّگور

انته بیت الطـّین گلبک،

یجذب الخطـّاف حبک کل سنه ابّیتک یزور

انته جنحان الحمامه،انته دمعات الیتامه الفطرت گلب الغیور

انته لضّایع علامه، انته لصّایم غمامه اوتمطر ابوکت الفطور

انته فکره ابذهن شاعر یملک احساس اوشعور

انته بلبل غرد ابروض المحبه،

توصل السّمع الحبیب اوتشتل ابگلبه السّرور

انته قطرات الغرام الوصلت الگلب الصّخور

انته نهر الفر نواعیر المحبه وانته محور کل نواعیر التـّدور

انته مرسال المحبه المُرسل ابجنح الطـّــیور

انته مهما اتغیب ترجع،

بــین فتره اوفتره تظهرتبرز اوتعلن حضور

انته موعود الخلیج الضـّــاگت الحلقه ابرگبته اوینتظرمنک ظهور

انته حبک ساکن ابلب الغیاره

اوموگد العذال هافت مایمس حته القشور

مـــحمدابوعمارالحزباوی

» المدونه:غروب الشط
» قصیدة صرنی للشاعر عزیز ابوعبیر البریهی -مدونة غروب الشط